معلومات عن الثقوب السوداء | صورة الثقب الاسود
علماء الفلك كانوا واثقين تماما من وجود الثقوب السوداء بسبب مجموعة من الادلة ، منها نظرية اينشتاين اللي اكدت وجودها ، وكمان موضوع مشاهدة العلماء للنجوم اللي بتدور حول نقطة غير معلومة اللي اتكلمنا عنها في المقالة اللي فاتت ، بالاضافة كمان انهم رصدوا مجموعة هائلة من الاشعة فوق البنفسجية وانعكاسات حقيقية مهولة بتنبعث من نقاط غير مرئية في الفضاء ، وبالتالي بالرغم من محاولة اختباء الثقب الاسود في الكون ، الا ان الحاجات اللي زي كده بتفضح مكانه .
والنقطة الغير مرئية اللي بتنعث منها اشعة وبتدور حواليها بعد النجوم ، كلها ادلة لتؤكد علي وجود ثقب اسود في المكان ، لكن فضول البشر متوقفش لحد هنا ، وقرروا انهم يقطعوا الشك باليقين ويحاولوا يصوروا الثقب الاسود ، وبكده يحطوا نظريات البرت اينشتاين تحت اصعب اختبار ، فلو شكل الثقب طلع مطابق للتصورات اللي قالها اينشتاين تبقي كده نظريات النسبية صحيحة مفيهاش اي أخطاء ، لكن لو شكل الثقب طلع مختلف عن التصور ، يبقي للاسف نظريات النسبية كلها خطأ ، واللي هتعتبر نكسة مهولة لعلوم الفيزياء .
ازاي صوروا الثقب الاسود ؟
الثقب الاسود اللي تم تصويره بيبعد عننا ملايين السنين الضوئية ، وهيحتاج تليسكوب صخم جدا جدا عشان يقوم بمهمة التصوير ، والموضوع اشبه بمحاورتنا لتصوير نملة موجودة علي سطح القمر ، وعلميا عشان يتم التقاط صورة واضحة لثقب اسود بيبعد عننا المسافة المهولة دي ، فهنحتاج تليسكوب حجمه مساوي لحجم الارض تقريبا، وده طبعا شئ مستحيل !، وعشان كده العلماء لجأوا لخدعة علمية بسيطة وهو ان يتم تصوير اجزاء متفرقة من الثقب الأسود ويتم تجميعها في النهاية في صورة واحدة ، حاجة اشبه بلعبة البازل ، وبالرغم من انها مهمة شاقة جدا ، الا انها اظهرت نجاح منقطع النظير .
وبالفعل وابتداءا من ابريل 2017 ، بدأ الفريق البحثي في العمل علي المشروع ، وكانت الفكرة الاساسية اللي اشتغلوا عليها ، هي عمل شبكة من التليسكوبات عبر الكرة الارضية ، والشبكة دي كانت عبارة عن 8 مجموعات من التليسكوبات متوصلين مع بعضهم البعض ، ومتوزعين في ارجاء الكوكب كله، في فرنسا واسبانيا وجرين لاند والمكسيك و تشيلي و هواي والولايات المتحدة الامريكية و القارة القطبية الجنوبية ، بحيث ان الشبكة دي تكون بديل لتليسكوب حجمه مساوي لحجم كوكب الارض، واطلعوا علي التليسكوب اسم (ايفنت هورايزون تيسلكوب) ، واللي نجح بالفعل في تصوير الثقب الاسود .
أسئلة محيرة !
من اكتر الاسئلة اللي تم طرحها حول موضوع تصوير العلماء لثقب اسود ، هو انهم ازاي قدروا يصوروا جسم غير مرئي ، وطبعا الثقب الاسود غير مرئي لان جاذبيته عالية جدا ، فبيمتص الضوء ومبيقومش بعكسه مرة تانية ، وبالتالي بيظهر علي هيئة عدم او فراغ .
والاجابة بتكمن ان في حلقات من الاشعة بتكون دائرية الشكل ، وموجودة في محيط الثقب الاسود وهي دي اللي بتحدد شكله ومكانه ، وحجمه ، وجوة الحلقات الدائرية دي ، موجود نقطة معتمة دائرية الشكل واللي هي الثقب نفسه ، اما بقي بالنسبة لتكون حلقات دائرية مشعة حول الثقب ، فده بسبب المواد والاجسام الي بتدخل جواه ، نتيجة جاذبيته المهولة ، ولان المواد دي بتسقط جواه بسرعات عالية جدا واثناء سقوطها بتتصادم مع بعضها البعض ، التصادم ده بيخلي المواد تسخن لدرجة عالية جدا ، اكبر من درجة حرارة الاندماج النووي بحوالي 14 ضعف !
واللي بدورها بتسبب في اطلاق اشعة راديوية واشعة سينية بكميات مهولة ، وهي دي بقي الدواير برتقالية اللون اللي بتكون حوالين الثقب ، واللي تم رصدها عن طريق التلسكوبات الراديوية .
ما وضع تنبؤات اينشتاين من الصحة ؟
في عام 1916 م تنبأ اينشتاين في نظرية النسبية العامة ، بوجود اجسام عملاقة لها قدرة خيالية علي ابتلاع اي حاجة تقرب منها ، والجاذبية بتاعتها تعتبر مالانهاية ، واطلق عليها اسم الثقوب السوداء ، وتنبأ كمان بأنها تحتوي علي افق دائري الشكل بيحيط بها من الخارج ، واي جسم بيقرب من الافق ده ، بيتفكك تماما قبل مايتم ابتلاعه من قبل الثقب ، وبينتج عن تفككه طاقة هائلة حتي لو كان الجسم ده الضوء نفسه ،
والكلام ده قاله البرت اينشتاين من اكتر من 100 سنة فاتوا ، ووصل للاستنتجات دي بدون تليسكوبات او اي اجهزة حديثة ، ولكنه توصلها فقط باستخدام الورقة والقلم ، وبعض المعادلات ، وفعلا بمرور الوقت ومع حلول العصر الحديث ، ظهرت ادلة واضحة عن وجود الاجسام دي فعلا ، واخيرا قدرنا نصورها ، واكتشفنا انها عبارة عن نفس التصور اللي قاله البرت اينشتاين بالظبط ، وبتخضع لقوانين النسبية العامة واللي تعتبر انتصار جديد لابرت اينشتاين حتي بعد وفاته .
الصور اللي تم عرضها للثقب الاسود اكدت صحة نظرية النسبية ، والانجاز ده يعتبر الباب لحل واحد من اصعب الالغاز اما العلماء ، وهو محاولة الربط بين النظريتين اللي بتخضع ليهم حركة الاجسام في الكون كله ، وهم نظرية النسبية العامة و اللي بتنظم حركة الاجسام الكبيرة في الحجم والموجودة في الفضاء الخارجي ، ونظرية ميكانيكا الكم واللي بتشرح حركة الذرات والالكترونات ، والاجسام متناهية الصغير ، ومازال لحد النهاردة العلماء بيسعوا بكل جهد للعثور علي حلقة الوصل بين النظريتين ، وعندهم امل كبير ان الثقوب السوداء تكون هي حلقة الوصل دي .
علاقة الثقب الاسود بالقرآن الكريم !
بعد الاعلان في المؤتمر اللي اعلنه عنه عن صورة الثقب الاسود، حلقات كتير عربية و صفحات علي الفيس بوك بدأوا يروجوا لفكرة ان الثقوب السوداء دي هي (الجوار الكنس) اللي ذكرت في القرآن الكريم ، والجزم بمسألة زي كده يحتاج الي دليل ، و مسألة الاعجاز العلمي في القرآن الكريم برمتها مسألة تحتاج الي تأمل ، لان الضرر اللي نابع عنها ممكن يكون اشد بكتير من المنافع اللي ممكن تيجي عن طريقها ،
وده لان كل اللي قدامنا مازال لحد الوقتي نظريات ، ومعادلات قابلة للصح والخطأ ، ولو ربطناها بالقرآن ربط جازم بدون اي دليل علي الربط ده إلا الاجتهادات الشخصي ، ربما يظن بعض الناس لو ظهر بعد كده خطأ النظريات دي ، ان القرآن هو الخطأ ،
وعشان كده بنحاول نبعد بقدر الإمكان عن الربط بين الاكتشافات العلمية الحديثة و القرآن الكريم، لان القرآن لا يحتاج الي نظرية او معادلة عشان تثبت صحته .
شاركونا رأيكم
تفتكر العلماء هيقدروا يوصلوا في يوم لنظرية تربط بين نظريات البرت اينشتاين ونظريات ميكانيكا الكم ؟ ، وياتري ايه اللي ممكن البشرية وقتها تحققه باستخدام نظرية زي دي ؟!